適逢馬年，@肥狗仔@首先喺度祝各位新春行大運。食樹皮之餘亦最緊要係身體健康，事業精精日上。講起過年，一家大細整裝出動與親朋戚友聚首一堂，身穿鮮艷奪目的戰衣，以最佳狀態迎接撲面而來的新年新氣像，可以話係各家各戶的例行工事。而喺香港，一部媲美拜年的例行工事就要數到黃百嗚的”喜事”系列。雖然電影主力針對賀歲檔期，但內容多年黎都係修修補補，劇情就更加唔洗講。對於今年犯太歲嘅@肥狗仔@，被迫著捧黃百嗚嘅場就好比到黃大仙求得下籤一支。若果各位都為揀戲而煩惱，以下介紹嘅一部另類選擇或者會為你轉返個好運。哩套就係改編自已故軍事小說作家Tom Clancy筆下人物Jack Ryan的典型荷里活大片《驚天諜變: 魅影特攻》(Jack Ryan: Shadow Recruit)。
即使你未睇過Tom Clancy嘅小說，但提到《追擊赤色十月》﹑《驚天核網》相信好多人都唔會陌生。自問打機多過食飯嘅朋友聽到《Splinter Cell》或《Rainbow Six》亦隨即熱血沸騰。自1985年Tom Clancy第一部軍事小說面世，一陣紅色風潮就直捲電影及電玩界。以Tom Clancy小說人物Jack Ryan為主題的電影以看似獨立的電影名稱，謙卑地掩蓋了這名多次拯救世界的美國英雄。12年後嘅今日，當年飾演Jack Ryan的Ben Affleck已經榮升金像級導演之列，而描寫有關角色的電影則正式捲土重來，並集結影壇新老一背帶領觀眾回到Jack Ryan的”入行”經歷。
《驚天諜變: 魅影特攻》講述年青有為的博士生Jack Ryan(基斯派恩 飾)因911事件而加入美國海軍陸戰隊，並在一次敵軍伏擊之中，負傷救出同僚多名，表現讓在任美國中情局高層的Thomas(奇雲高士拿 飾)極為欣賞，繼而說服Jack投身金融業，意圖是替中情局做間諜，截取恐怖份子情報。另一邊廂，一名叫做Viktor(簡尼夫班納 飾)的俄羅斯愛國者試圖利用股票市場及恐怖襲擊雙管齊下使美國進入第二次經濟大蕭條。儘管其陰謀好快被Jack識破，但時間已經所乘無幾。單憑Jack一人的力量再加上其身邊手無寸鐵的未婚妻Cathy(姬拉麗莉 飾)究竟可唔可以化解哩場”滅國”危機呢..
自《叛諜追擊》橫空出世，往後的荷里活動作片不論在拍攝上還是題材上，或多或少注入了有別於007及John McClane，講求緊湊及凌厲的情節。所以哩部中文譯名包含”諜變”及”特攻”兩個語彙嘅電影所俾我嘅第一印象，除咗深深感受到本地電影公司在電影譯名方面黔驢技窮之外，對戲中劇情發展亦大概有個畫面。不過喺《驚天諜變: 魅影特攻》入面，主角Jack Ryan並非一名”猛男”。既冇殺人經驗，亦冇接受鬼塚式嘅地獄集訓。所靠嘅只係當兵時嘅求生技巧及一個智勇雙全嘅腦袋。編導試圖用Jack喺俄羅斯的遭遇當作成一次應對國際危機嘅預演。電影由最初主角被戰鬥民族的威脅嚇到企都企唔穩，去到最後則以孔明般的姿態成為狙捕犯人的王牌探員。問題係有關蛻變只係花咗一兩日去完成，短時間內就有如此分別實在令@肥狗仔@覺得匪夷所思，那怕Jack背後有一支後援精英及一出場就預咗要被捉走的未婚妻…
伴隨著商業片必然出現嘅犯駁位，本片的劇情發展相當”大路”。拋開勁食老本嘅美俄關係，好似聲東激西﹑入侵企業電腦等慣常的特務片元素比比皆是。惟獨於電影中段出場嘅魔盜”女”王姬拉麗莉誤打誤撞地加入中情局陣形的情節頗為突出。及後更以美人計纏著反派，替未婚夫的間諜工作爭取時間。期間先是與Jack Ryan打情罵俏，再和反派Viktor共進晚餐。睇著哩對未妻男女輪流以爆發性的演技欺騙Viktor，並全身而退的確係幾過癮嘅一件事。有關嘅酒店鬧劇亦都係全片最值得留意嘅地方。
另一方面，當觀眾睇到中段嘅時候發現本片與”諜變”兩字相差甚遠，目光就開始轉移到火爆的動作場面身上，可惜電影嗰堆槍戰駁火與飛車追逐完全係點到即止，發生喺Jack身上嘅各種災難紛紛作出讓賽，令到平日威風百面嘅恐怖組織頭目﹑守衛深嚴嘅跨國公司，甚至係可以將整個華爾街移為平地嘅驚天核武顯得非常兒喜。其實無可否認電影將每個情節都處理得比什麼《職業特工隊》更一氣呵成，如果起伏能夠再大一點相信效果會更為理想。用一句黎形容《驚天諜變: 魅影特攻》就應該係 “刺激有餘，緊張欠奉”。
豪華卡司陣容喺某程度上增加了本片的可觀性。單單係奇雲高士拿還有自導自演的簡尼夫班納足以引黎一班影迷捧場。前者發揮程度有限，後者則展示了精湛演技。Viktor作為一個受過高等教育的智識份子，演員要突顯其角色的愛國狂熱，又要表現出其不失理智及風度的一面，簡尼夫班納可以話係100%完成哩個艱鉅任務，將一股難以言喻的悲傷感注入這個十惡不赦的大奸角之中。而近年經常被他人搶盡風頭嘅”艦長”基斯派恩，今次黎到主場仍然逃唔過被搶戲嘅縮命。站在@肥狗仔@角度，一切可能都係非戰之罪，始終差唔多嘅年紀，差唔多嘅職業，喺Jack Ryan前面仲有一個Jason Bourne。
今個春節香港實不乏賀歲片種。不過喺丹爺嘅《大鬧天宮》及《六福喜事》夾擊之下本片都幾難獨領風騷。情況就好比戲入面即使動用了Tom Clancy筆下的知名人物及軍事觀，但只要電影一日未能突破特務片的框架，觀眾就依然會不自覺地墜入審美疲勞的陷阱之中。《驚天諜變: 魅影特攻》以Jack Ryan的初哥經歷將美俄的冷戰灰燼重燃起來。佢未必乎合軍事或間諜片迷的期望，但喺書迷眼中，本片對Jack Ryan的”補完”工作應該係合格有餘了。
個人評分: 6.5/10
>
有你既支持，就係我地最好既推動力，齊齊參與
「有玩、有FUN … Post76.com」
<
歡迎進入我地論壇對本文章發表您的回覆啦^^”
http://www.post76.com/x2/forum.php?mod=viewthread&tid=180574&fromuid=16
*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***
