人就好現實，每聽到”打風”兩個字，第一時間唔係唸起天災人禍，而係掛8號波。當然，最後有關嘅”美夢”通常會喺幾個鐘內幻滅，個風叫咩名亦好快會忘記。之所以會講哩翻說話唔單止因為《風暴》一片包含咗”打風”元素，上述嘅一個例子其實係可以完全套落本片入面…
繼去年《寒戰》之後，製片人江志強聯手華仔再下一城，製作警匪動作猛片《風暴》。過去幾個月本片各款火爆預告與製作特輯佔據咗戲院廣告及互聯網，雖然卡司方面對比《寒戰》稍為遜色不過單單係”劉華X槍戰”足已成為眾人入場的誘因。喺過去嘅黑色星期五@肥狗仔@就忙裡偷閑，離開繁重的工作及學業，並戴著德軍鋼盔走入戲院準備迎接槍林彈雨的到來。點知睇到一半，先至發現自己猶如戲入面果堆伏喺地下嘅死屍，被一段段狗血情節轟得體無完膚。
《風暴》講述由華仔飾演的警隊先鋒呂明哲多年來為狙捕無惡不作的犯罪組織頭頭曹楠(胡軍 飾)，先後派出卧底竊取線報，但每次都因證據不足而讓曹楠繼續逍遙法外。直到明哲遇到小學舊同學 — 由林家棟飾演的陶成邦。這名經常進出監獄的古惑仔作為曹楠的得力助手，得知女友懷孕後內心一度在情與義之間痛苦掙扎。而性格急躁的明哲希望從成邦身上套取曹楠犯罪紀錄未果，卻改用自己的方式讓曹楠受到法律制裁，為儆惡懲奸不惜違背自己多年來的執法信念。一場風暴正式展開…
法律與公義哩個永遠的矛盾一直都係唔少警匪或者犯罪電影所鍾情嘅探討對象。所以《風暴》所表達嘅中心思想實在唔係咩新鮮野。回顧整套電影的表現，@肥狗仔@覺得”風暴”哩個戲名改得尚算切題合議，事關喺本片中”風暴”不單止係兩位主角一股無形的內心表現，電影更將有關的心理掙扎，通過各場激烈交火的混亂與痛苦加以反映，令一場典型警匪槍戰提升至一種心理描寫的視像表達。
與帶著腥風血雨的”暴風圈”相比，本片的”風眼”卻出奇咁細。 事實上除咗上述的電影主題同埋火爆場面之外，《風暴》就真心冇咩內涵可言。本作節奏趨向明快，故角色的內心戲份安排一般會影響到全片聚焦。若果將劉華內心的風暴作為要旨，咁意味著電影開頭果一個鐘都係帶觀眾遊花園，然後為保情節的緊湊性又匆匆帶過角色的文戲，直落狂轟中環的高潮部份。雖則有關鋪排或者正合某類觀眾口味，但@肥狗仔@睇完後就完全俾唔到分。
故事的另一敗北落喺林家棟所扮演的陶成邦身上。利申，個人都幾喜歡林家棟做戲，特別佢喺《神探》入面嘅表現真係十分精彩，可惜同劉青雲一樣屬於冇運之人。分別在於林家棟嘅事途亦平平坦坦，即使係出演配角，一出場就好似等死般的存在。黎到《風暴》，名義上終於升LV做男主2號，然而上天再次與林生開大玩笑。陶成邦的個人決擇其實比起呂明哲要單純得多，就係究竟揀”食大茶飯”定揀”感情”。喺電影嘅前半部@肥狗仔@對哩個設定深信不疑，但隨著劇情發展竟然出然咗另一個版本: “兄弟情” VS “感情”。造成混淆嘅原因除咗係本人理解能力出現問題之外，亦基於本片就成邦及其江湖兄弟間情義結的描述係真真正正嘅零。劇本上的失誤導致成邦的矛盾連同佢自身的角色定位都幾近模糊。同時，故事又偏偏喺一啲雞毛蒜皮嘅地方著墨。例如明哲與成邦兩人的小學同學關係就算冇對劇情影響都唔大，如今加入相關設定，咁兩人嘅第一場對手戲就多野講好多。做編劇嘅真係爽喇。
電影的其中一個宣傳位係戰爭級別的槍戰及動作鏡頭。拍攝上感覺唔到有咩特別突出，但槍戰規模及傷亡人數就似模似樣。當中唔少得港產片經常出現的棚架肉搏還有特技反車。平心而論雖則與荷里活大片仍然有一大段距離(穿崩位也不少)，但既然片方有意識將港產片一貫的槍戰戲提升至一個新水平，尤其是本片的槍戰位只限於三場，出到黎嘅質量絕對係可圈可點。
正如上面提到，本片嘅槍戰拍攝係有待提高，但有啲情節則處理得過份認真，引至爆笑連場。講到笑位不得不提到劉華，近年@肥狗仔@對劉華的表現都唔抱有期望，所以不時都會有意外驚喜。好遺憾係哩份驚喜並冇延續到《風暴》一片。劉華仍然係嗰個劉華。同樣道理，不論係本地定外地製作，睇得哩類商業片，相信觀眾都預咗會有公式化嘅犯駁位。換句話就係主角往往Die Hard上身，其他大茄連樣都未睇得清就飛咗出鏡頭範圍。《風暴》其中一個叫人哭笑不得嘅情節無疑係當嗰啲著到成個G.I.JOE咁嘅防暴隊可以一個手榴彈炸死十件八件，而劉華只係著咗套避彈衣，那怕身邊架車突然零距離爆炸，那怕係佢本人已經被炸上半空，最後都會安全著陸，身體依樣完整，髮型依舊靚仔。或者哩一幕先係全片最令本人印象深刻嘅。
今次哩份評測貌似滲透著唔少怨氣，打個比喻，若果你玩大富翁唔好彩入獄，幾經辛苦終於擲夠三次骰出獄，但隨即抽到一張強制入獄嘅機會卡… 《風暴》承繼咗近幾年部份港產片的特徵 — 製作認真﹑劇本低劣。 由90年代的銀河時代開始，至今理應手到拿來嘅警匪片都可以接二連三地出現失誤，難免叫人大呼無奈。樂觀去睇，《風暴》以大規模的槍戰及視覺效果提高了港產片的整體下限; 悲觀而論，風暴過後，雨過天晴，風姓何名則無人問津。
個人評分: 6.4/10
[終極版預告]《風暴》(FIRESTORM) 官方預告
>
有你既支持，就係我地最好既推動力，齊齊參與
「有玩、有FUN … Post76.com」
<
歡迎進入我地論壇對本文章發表您的回覆啦^^”
http://www.post76.com/x2/forum.php?mod=viewthread&tid=177168&fromuid=16
*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***
