早前紅爆網絡嘅真人短片《一生只想尋找一個肯挨麥記的女人》相信唔少76的版友都有睇過。該短片冇大明星﹑冇好強嘅攝影技巧，內容更有點浮誇，但勝在引起觀眾共鳴。而今日要介紹嘅哩一套勵志小品《四季人生》與前者同屬中學生作品。內容集中描寫了四個中學生溫馨及勵志的個人經歷。
《四季人生》由仁濟醫院董之英紀念中學全權製作，導演李力持擔任總導演，再加上全校一眾師生，還有不少影視藝人鼎力參與而成。算得上係香港首部在戲院上映的學界長片。不過即使本片從宣傳﹑到獲獎及參展紀錄還有演出陣容都絕不失禮，大家可能仍然有疑惑: “一套學生拍嘅電影係咪真係值得俾錢入場呢?” 以下的電影短評或者俾到各位小小參考。
“四季”一片根據董之英中學四位學生的真人真事改篇 — 高考在即，夢想為全職足球員的阿朗在學業與理想之間掙扎; 欣妹的右手患有先天萎縮，在家人的多年愛護之下，其慢慢走出了缺憾的陰影，則不知道這種看似理所當然的愛背後隱藏著家人的密密付出和犧牲; 振宇(唔係Sam哥)終日發歌星夢。直到一次老師的賞識，振宇獲任該校台慶的舞台總監，將自己的表演天份充分發揮出來; 陳毅患上末期癌症，短暫的人生進入倒數階段。為了回應家人朋友的關懷﹑回應自己的生命，陳毅仍然堅定面對最後的一分一秒。
人生在世，有時前路難免好似戲名”四季人生”一樣充滿起伏。以戲中的故事為例，四位中學生過去一直過著風平浪靜的日子，每人都有自己的目標，但”如何實現﹑要唔要實現”，對哩班毛都未出齊嘅年青人黎講可能係好遙遠嘅事。而電影就聚焦喺當四位同學遇上突如其來的人生交叉點，他們的態度點樣受到身邊人甚至自身信念而轉變，哩點係本片所帶出最有意思的地方。因為四季交替，人不可改變，但只要意志堅定，總能未雨綢繆，為將來定下目標，向自己的人生負責。雖然”四季”的故事喺旁人眼中或許又係老土的學生勵志劇情，但@肥狗仔@認為仍然值得人去反思。特別係好多時我地都只係活喺社會的主流模式底下，想要從中搵出突破點，本片一眾主角的遭遇或者係你嘅重要啟示。
講返套戲的拍攝。由總導演李力持帶領下，由執導﹑演出﹑掌機到收音絕大部份工作都由學校師生負責。出黎效果本人覺得已經相當難得，部份鏡頭的構圖更加媲美專業攝影師的作品。當然話電影已經有專業水準就仍有一段距離，可能負責攝影或者收音的同學未習慣長片製作，有唔少鏡頭移動都顯得生硬，而聲軌亦出現雜音過多，還有擦聲問題等。如果你介意哩類瑕疵，或者演員的精彩演出能夠使你對電影有較好印象。的而且確片中每一個演員都演得頗為出色。姜大偉﹑謝雪心等老戲骨不再講，一班董之英的師生亦都”交足功課”。特別係”沈sir”一角將老師對學生的嗰份緊張表現得非常自然(可能做返真實的自己吧)。表現同樣出色的仲要數到飾演”陳毅”的方天保同學。從扮演一個生命接近盡頭的青少年角度黎睇，方天保不單在言行舉止上模仿了真實病人的狀態，就連表情細節都掌握到位，使角色更具真實感。在病魔的折磨下，縱使倦容滿面，但其每一次的奮鬥，都令本人感同身受。作為一個理論上冇學過戲的中學生而言，方天保能夠將”陳毅”演繹得如此生動，@肥狗仔@都真係要俾個”like”佢。
個人唔敢講《四季人生》係非睇不可。以學生作品而論，本片有咁嘅質素稱得上合格有餘，但始終觀眾已經習慣咗花錢睇專業拍攝的電影，更何況戲中純粹宣傳校園的情節都有唔少，值唔值得入場就見仁見智。不過”四季”的亮點在於戲中的年青人所面對的問題好多時都係都市人比較常遇到。如果你或者你的親友最近遇見上述煩惱，@肥狗仔@在此可以推介大家哩齣《四季人生》，話唔定對你日後嘅發展路向有重要參考。
個人評分: 6.8/10
>
有你既支持，就係我地最好既推動力，齊齊參與
「有玩、有FUN … Post76.com」
<
歡迎進入我地論壇對本文章發表您的回覆啦^^”
http://www.post76.com/x2/forum.php?mod=viewthread&tid=174824&fromuid=16
*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***
