一排唔見唔知大家既玩具玩成點呢? 我自己就玩得好開心啦! 而家新 Model 出得好快, 而且價錢亦都越黎越貴, 所以相信一定好多人同我一樣, 節衣縮食餐餐樹皮咁儲錢買新玩具啦! 好勒, 講返今日主角先, 今次終於唔係玩私伙野勒, 因為借到對價錢非常具競爭性既耳機, 就係呢隻 EOps出既 “NOISEZERO O2+”返黎做評測, 呢對耳機試完之後, 感覺其性價比都幾高, 而且有小小 Gimmick 野既, 好啦 … 廢話少講 … 去圖!!!
耳機規格
老規矩, 先講講耳機既Spec先, 之後再同大家講下造工方面! 首先, EOps方面知道大家都會長時間佩帶住隻耳機週圍去, 舒適度當然係頭帶式耳機不可輕視既一環啦, NOISEZERO O2+就係全球第一對用上Comply™棉既耳機, EOps為左可以令用家有硬舒適的體驗, 特別找來耳綿界專家Comply™成為合作夥伴, 為這隻 NOISEZERO O2+ 耳綿度身設計, 呢點除了夠話題性之外, 絕對係有其實際功能的, 廠方的確別具心思呢!
同軸式單元
好勒, 講完外在美, 就當然要講下內在美啦, NOISEZERO O2+ 用左一個40mm低頻振膜單元同一個24mm中高頻振膜單元, 以同軸式的單元設計, 呢個設定係耳筒設計上唔算常見, 所以都覺得幾新奇. 至於造工方面, 小弟覺得其特點係完全設計為了方便大家帶出街+吸人睛(眼睛呀XD)+粗用(唔易花或爛)地設計的! 再加上簡約既設計, 我覺得真係型喎!
Comply™耳棉
NOISEZERO O2+頭頂條Bar就係用軟綿來做物料的, 而兩個耳罩當然就係上用Comply™耳棉 (真係好軟好正^^”), 耳罩收納就採取左可屈式既設計, 隨身帶都幾方便, 唔會太阻位置, 不過唯一唔好既就係無咩配件送, 好似耳機袋啦, 大細頭啦, 多對耳綿替換啦………..(@@”大佬…$1000都唔洗就可以入手, 你想點先!!!~_~)
老實講, 原本對隻耳機真係冇咩期望, 事關呢個價錢我個人覺得音質上, 可以比到我既效果應該好有限, 先唔講開聲, 只係帶上頭….…先有第一個驚喜……E~~~~真係好舒服喎, 之前我其實都玩唔小 ON-EAR 耳機, 有絲絨, 有真皮, 但用上Comply™耳棉既NOISEZERO O2+, 一帶上頭真係比到好強烈舒適感同貼服感比我, 真係唔錯, 不過我個頭超大 (所以兩邊我拉到盡先可以緊緊戴到, 超級大頭人士可以忽略以下既評測…), 總算叫做戴得到, 而上左頭之後, 耳機既隔音真係出奇地好喎, 周圍既聲音起碼都可以隔走80%以上, 戴住佢幾乎唔係好聽到身邊既噪音 (定係我個頭大呢…), 呢點絕對值得一讚呀! 不過如果大熱天時, 如果戴住佢出街, 唔知會唔會有小小熱呢~~XDDD
音質測試(iPod Classic 160GB + Theorem 720 DAC Announcements)
耳機講到點形點舒服都好, 始終聲音先係其主角, 我又點會唔同大家分享一下究竟呢隻HKD$998既耳機, 究竟聲底同聽感係如何的呢??? 首先我用上我平時出街既組合 iPod Classic 160GB作為音樂訊原, 再連接Theorem 720 DAC Announcements DAC + 耳擴, 而測試既歌曲就用上小瑟大王早前介紹的林子祥 – 最愛 (Mastered at Abbey Road Studio)中, 第二首的”史泰龍 Lambo” WAV檔, 大家都知道, 呢首歌係節奏感非常強烈既歌曲, 用佢來試試耳機既低頻彈跳力就最好不過了, 一開聲, 開首的低頻彈跳力強, 比我想像中要好, 居然比到小小打心口既感覺我, 低音收放速度偏快, 唔算潛得好深, 對我黎講可以話係剛剛好! 至於中頻方面比較偏暗, 暫時試聽比較平淡, 而高頻方面, 可能因為有個中高膜 (大家唔好整穿佢呀…得一塊ja!!!), 我覺得聽得高頻位置絕對舒服, 聽亞Lam把聲好入耳, 磁性非常, 男聲算交到功課呢.
之後再試日本女聲 Angela Aki大家最熟悉的”手紙 ～拝啓 十五の君へ～”, 一開始既鋼琴演奏, 聽上去有一點點”痴”地, 不過情況唔算好嚴重, 但Aki一開聲, 企得好前, 把聲出來效果好滑好爽, 雖然唔可以話佢唱既每粒音都好Sharp, 不過歌者既演繹同音樂一致性做得非常之好, 呢個絕對係受惠於同軸式的單元設計, 傳導性非常之高, 以此價位來講, 算係可以了, 雖說不上係女毒, 不過勝在平均, 而測試期間, 大大話話都聽左半個小時, 耳骨位置完全唔覺得疲累, 抵讚呀!!
最後, 我個人認為, NOISEZERO O2+主要市場都係針對貪方便用耳機直推之人士, 所以小弟就用左Sony Xperia Z黎作測試 (留意呀, 唔係ZX1呀…大家唔好眼花…我自己都好想換機…..~_~…), 聽返同樣二首歌曲, 由 Sony Z直出既效果竟然都可以接受喎, 推力足夠, 我開到大既仲有二格先盡, 音壓已經有平時便用之音亮, 而音質雖然同IPC+720有距離, 但以一部電話直出表現來說, 收貨有餘, 大約有可以有返7成以上之重播能力, 所以大家可以放心用自己心愛電話黎推呢隻耳機呢!
總結
試到呢度, 都係時間同大家來一個評測總結勒, 簡單D講, 呢對耳機我覺得賣點在於以下幾點:
1. 價錢合理而且有競爭性
2. 低頻頗討好
3. 配戴好舒服 (除左超大頭人士)
4. 隔音尤其滿意
5. 分析力頗強
6. 三頻平均而且耐聽
講真以呢個價錢我個人真係絕對收貨, 論性價比呢對耳機絕對俾到驚喜大家! 而最後我上網Search左一陣, 發覺原來之前”橫洲工業”同”O2+”曾經Crossover出過一對慈善限量版, 連潮人余文樂都有戴住, 果然係又可以享受音樂又可以做到善事, 真係一舉兩得呢!
>
有你既支持，就係我地最好既推動力，齊齊參與
「有玩、有FUN … Post76.com」
<
歡迎進入我地論壇對本文章發表您的回覆啦^^”
http://www.post76.com/x2/forum.php?mod=viewthread&tid=172440
*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***
