香港多年來一直被評為貧富懸殊最嚴重的先進城市。最近政府就整咗條貧窮線，但貧窮線不等於扶貧線，只作評估日後政策的方向指標。咁岩得咁橋，岩岩前個星期上畫嘅哩套科幻片《極樂帝國 2154》(Elysium)又有涉及貧富差距問題。入面條”貧窮線”亦都唔係用黎扶貧，而係用黎分隔”庶民”同”有錢人”嘅階級制度。對於一般觀眾，電影中嘅各種隱喻會令人覺得非常應境。但若言你係科幻動作片嘅die-hard fans，或者你寧願返屋企睇《極樂寶鑑》好過。
《極樂帝國 2154》由一炮而紅嘅荷里活科幻新力軍Neill Blomkamp執導。其處女長片《D9異形禁區》當年結合偽紀錄片手法與電腦特效嬴得了一眾影迷的垂青。四年後嘅今日Neill再接再厲，並通過貧民區與未來科技的強烈對比將哩種科幻風擴展到”貧富”主題上。@肥狗仔@不得不承認事前自己對”極樂”一片有幾高期望，亦因為咁所以完場後本人連con都跌埋出黎。與其話係”失望”，或者用”可惜”去形容更為貼切。”極樂”不乏強大的影星陣容，不乏超卓的視覺特效，亦不乏可塑性極高的背景設定，唯獨欠缺一個識得剝鹿角嘅編導。
社會階級係各個資本主義社會的核心之一，當中以經濟能力或職業將眾人分為幾等，籠統黎講就係”富”與”貧”。前者無論係社會地位，權力及生活質素都有絕對優勢。而本片其中一個特別之處就係將哩份社會矛盾形象化。喺”極樂”入面，有錢人同窮人的處境係貨真價實嘅”一天一地”。基於地球受到嚴重破壞及污染，有錢人一舉搬到鄰近地球的人造太空站”樂園”以維持奢華生活，另一方面又繼續經營地球的公司，要嗰啲生活於水深火熱之中嘅基層人士為自己的榮華富貴賣命，且不提供任何工傷保障或經濟回饋。此舉促成咗一種搖距奴役式的畸形階級統治，因為兩批人的隔幕唔再係領土邊界，而係科技水平。當地球人仲為生老病死煩惱嘅時候，樂園人就每家都裝有能醫百病嘅醫療設備，更未計嗰堆24小時喺地球監控著地球人嘅機動警察。山寨王或者馬克思主義等潛在勢力即使想揭竿起義，佢地最起碼仲需要一套太空衣。
喺精心炮製的世界觀下，”極樂”主要講述地球工人Max因為一次意外而面對致命疾病威脅，故誓要破釜沈舟，用儘一切方法到達”樂園”自救。同時，樂園國防秘書長Delacourt對”偷渡者”的百般阻撓令到Max身陷險境之中… 單睇幾隻字嘅簡介，好多人或者會覺得哩種”貧民窟 + 科幻 + 追捕 + 階級矛盾”嘅情節好似熟口熟面。但經深入了解後，我地就會發現”極樂”比起”D9”更能引發觀眾共鳴。
個人比較欣賞係電影所講的唔單止係一個貧富差距的極端例子，更一定程度反映出社會的真實情況。與Max一樣，即使身處於一個飽受壓迫嘅社會，但喺好多地球人眼中一切公義與及身份認同，都唔比樂園的優質生活黎得吸引。那怕係豐衣足食的Delacourt，亦貪圖更大政治權力。正當觀眾以為人類永無止境的欲望係導致貧富懸殊的罪魁禍首，”極落”卻告知大家貪婪係人類嘅天性，而引發社會矛盾嘅源頭在於人類欠缺同理心。記得電影入面一開始有幕關於修女告誡屢次偷竊的幼年Max，叫佢喺追求升官發財之餘千其唔好”忘本”。由此可見居住於樂園嘅富豪就係忘本嘅一群。同樣係人類，只因經濟地位不同就擺出非我族類之說。拒絕向崩壞嘅地球伸出援手不特止，仲要搬離地球，並繼續剝削地球資源。哩種危險嘅階級觀念造成社會上嘅惡性循環，即基層想踏入上流社會，事成後又開始恃勢凌人。我地平時經常喺新聞上面聽到有工人發起群眾運動，或者係某員工開槍射殺公司負責人。此等極端事件就係由階級制度衍生出黎嘅條件反射，同時亦都係社會發展背後嘅哀歌。但若果上層人士可以體恤百姓，咁最後得出嘅結果可能先呼合到真正烏托邦式的”極樂世界”。雖然”極樂”貌似又將中國嘅儒家學說重提一次，但現實中好多企業甚至係政府都未能做到(包括香港)，哩點亦都係”極樂”給予觀眾嘅最大反思。
值得一讚係雖然本片所呈現的世界極其架空，不過編劇喺某啲小細節上仍然顯得唔願意同現實脫勾。 例如有一幕就影射政府做事喜歡借刀殺人。其中講到有班地球人坐飛船偷渡到樂園，中途樂園當局派出特工Kruger從地球發射地對空火箭炮將太空的飛船逐一擊落，而哩批飛船當時已經進入樂園防空系統的射程範圍…唔知有關橋段係咪想影射三角洲部隊或者黑客政治活動，但有時候哩類”意外”只係涉及國想對內保住自己”完美”道德形象，而進行嘅例行公事。那怕係明眼人都睇得出邊個係幕後主使。
好喇，有讚無彈嘅段落已經講完，此因當電影播放將近一半仍然未有咩火花擦出嘅時候，觀眾嘅惡夢先至真正開始。縱使“極落”嘅背景設定滲透住編導嘅野心，亦難掩劇情上的失敗。最大關鍵係本片連最基本嘅”起承轉合”都出現問題。首先”極樂”並非男主角Max的個人solo。喺108分鐘嘅片長入面，電影花咗唔少時間落民生同其他角色身上，包括秘書長Delacourt的內交與外交政策，和特工Kruger的爆炸性演出都佔相當份量。如此一來，Max的戲份自必冇想像中多。而觀眾唔難發現自Max裝上強化裝甲之後，未曾遇過什麼驚心動魄的大劫難就倉猝咁順利飛上”樂園”。 幾近直線的起伏無疑係本片嘅一大敗北，而更大敗北係即使你只係想睇子彈橫飛，或者拳拳到肉嘅動作場面，”極樂”亦俾唔到幾多。歸根究底，Max嗰身改造裝甲只係對本片中後期的戰鬥給予合理解釋，而唔係為其帶黎鐵甲威龍般的戰鬥力。其實@肥狗仔@覺得”極樂”嘅內容絕對唔係個半鐘頭可以講完。如今電影對其世界觀有充足嘅描繪，但偏偏又將動作及高潮位草草了事。此舉若言唔係編導失策的話，就必定係有少少眼高手低喇。
之前不斷聽到有人話”極樂”缺少”D9”時嘅新鮮感，但平心而論若果冇咗特技及紀錄片鏡頭處理的話，”D9”本身作為動作片只算合格，基於今次Neill唔再玩紀錄片式攝制，其導演功力初見真章。有一點令人十分在意係”特寫慢鏡”喺電影入面接二連三咁出現。站在導演立場可能想突顯各種裝備武器的金屬感及力度，但站喺本人角度，如果唔係3D電影的話，哩類”耍帥”的鏡頭最好都係適可宜止。對於一部動作片，火爆與緊湊嘅情節先係重中之重。考慮到哩兩點元素再去評估”極落”嘅整體動作表現，Neill仍然要向老前輩學習學習(例如 Michael Bay)。
可幸是，哩齣科幻大片的特效仍然合乎預期。導演Neill Blomkamp係做後期製作出身，拍科幻片自然唔會有難度，但有睇過”D9”嘅朋友都知道其作品有別於典型嘅同類片種，主打”科幻寫實”路線。相同風格今次繼續喺”極樂”上大放異彩。 電影入面嘅特技及相關道具都係務求讓假想的未來科技與現實生活之間取得平衡。當中嘅概念設計更係出自荷里活御用插畫師Syd Mead，還有”魔戒”藝術總監Philip Ivey之手。@肥狗仔@獨愛嗰件支撐住Max嘅強化裝甲，其外形就好像由身體分肢出另一副骨架般。實用性暫且忽略，設計上就真係十分前衛。而類似嘅設計亦盡顯於部份細節之中。舉例，片中嘅民用槍械好似AK47都會針對性地加上時代感滿滿的描準器。哩種對比設計嘅獨特，我會用”廿一世紀嘅《未來水世界》”去形容。
與香港嘅劉華唔同， Matt Damon一向好識揀戲拍。其接親嘅電影衰極都有個限度，而顯然今次就係佢接得最錯嘅其中一次。哩度唔係講緊套戲有幾咁不濟，而係指Matt Damon嘅表現。先不論佢嘅身形仲適唔適合拍動作片，就片中普通文戲而論，Matt Damon嘅演出只屬一般水平。要佢演活土生土長嘅墨西哥古惑仔Max，單單係剃光頭同練肌肉依然欠缺說服力。查實Matt Damon近年雖然不斷嘗試新角色，但喺演技上一直冇較大突破。對本人黎講，佢除咗係Jason Bourne，仲有就係個永遠的陽光男孩，永遠都係…
至於女主角Jodie Foster，佢飾演嘅Delacourt就真係入型入格，亦都可以話係本片最出彩嘅角色。基於片中Delacourt係個有強烈官僚主義嘅女局長，配合Jodie Foster嘅硬朗與女強人形象，令哩個角色就有如魚得水一般，不論係向下屬落嘅每一道命令，還是對總統嘅無禮挑釁，每句台詞每個表情都將Jodie Foster爐火純青嘅演技發揮到頂點。
另一位同樣搶眼嘅角色就要數到冷血凶殘嘅特工Kruger。佢一身嘅難民look再加上面上嘅胡鬚多到同未剃鬚嘅聰明笨伯一樣，老實講最初本人並未認出飾演哩個大反派嘅人就係導演Neill愛將—Sharlto Copley，直至佢開聲嗰吓…在此不得不佩服Sharlto Copley又再用佢嘅南非口音及老練嘅演技證明自己廣闊嘅戲路。
近年荷里活有兩位科幻新生代本人十分睇好。一位係J.J. Abrams，另一位就係Neill Blomkamp。皆因J.J. Abrams已經走去與”原力同在”，哩家就得番後者仍然繼續緊個性製作。要知道尋找屬於自己嘅風格及故事可以話係一個導演嘅終生課題。Neill嘅優勢就係老早就搵到鍾情嘅題材，縱使作為一套動作片，《極樂帝國 2154》的確未夠能登上大雅之台，但作為導演嘅第二部作品，成熟的特效應用，寓意深刻的故事背景，還有極賦時代感的科幻設計都令人睇得津津樂道。@肥狗仔@深信只要Neill繼續自己嘅一片天，終有一日佢會真真正正成為荷里活科幻大片嘅中堅力量。就好似一塊上等神戶牛肉遇上一個中菜大廚一樣。即使大廚想用自己嘅方法炮製，亦要經過多次嘗試先可以烹調出獨特嘅美味。唔計籌備中嘅”D10”，哩家Neill Blomkamp第三部科幻新作《Chappie》已經進入拍攝階段，並預計2015年3月上映。到時我地又睇吓導演會帶俾觀眾咩新驚喜啦。
個人評分: 6.9
>
有你既支持，就係我地最好既推動力，齊齊參與
「有玩、有FUN … Post76.com」
<
歡迎進入我地論壇對本文章發表您的回覆啦^^”
http://www.post76.com/x2/forum.php?mod=viewthread&tid=171024&fromuid=16
*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***
