前排有張cap自電視劇《神鎗狙擊》嘅”膠圖”。講述謝天華喺冇任何安全裝備嘅情況下，徒手爬山。途中電話響起，於是天華就用右手捉住山石，雙腳縣空，然後面不改容咁用左手拎起電話，完成人類首次嘅爬山覆call，喺《神鎗狙擊》入面，謝天華作出了自己嘅決擇。為咗型，佢甘願冒住生命危險都要用單手接電話。而喺電影《狂舞派》之中，一班年青人亦作出了人生決擇。為完一個跳舞夢，佢地選擇咗付出及犧牲。
本人一向唔太好歌舞片，更唔好話港產嘅舞片。所以寫哩篇影評就如同電影裡面嘅舞者表演一樣吃力。但相信好多觀眾同@肥狗仔@一樣，相對於哩類青春狂熱片種，商業大片的吸引力始終比較高。其實這種現實情況就正好反映喺《狂舞派》。影片雖然主打青春舞蹈，各種熱血沸騰的Hip-Hop舞表演示充斥在整部電影之中，不過同時，電影亦反映出街舞表演一直被社會所排擠。女主角豆腐花的父母視跳舞為年少無知的活動; 思想開明的大學因為一對不知名的男女在舞社活動室偷食，而沒收舞社BombA的活動室; 那怕係”業界最強”的Rooftoppers，其練舞場地也是在工廠大廈內進行。
雖然本片最初就為哩班年青人設下幾道”高牆”，但《狂舞派》比較特別嘅係戲中的主角與電影本身都無視上述障礙。豆腐花一開始就係個跳舞高手，沒有艱苦訓練，亦沒有遇上技術樽頸。反之電影一直以”舞蹈”來推動劇情，始因電影想要宣揚的是一種純粹的夢想追尋。真正的”尋夢者”是不會為理想設下任何前題。就好似戲中一班年輕舞者，只要佢地想跳舞無論係課室定天橋底都阻止唔倒。個人比較深刻嘅一場戲係Rooftoppers領頭人Stormy走到因腳傷要坐輪椅的豆腐花面前”挑機”一幕。被傷患問題困擾的豆腐花由於喪失鬥智，對跳舞夢轉為消極，更取笑處事認真的Rooftoppers隊員。接著Stormy隨即向花展示自己的義肢，並跳起激勵之舞，最後講咗一句說話: “這就是青春的傷痕，不要取笑”。這句說話力度十足，仿如打了花，甚至打了觀眾一巴。夢想靠的不是一間課室，也不是靠擺動舞姿的身體，最重要係意志。
社會上好多人都聲稱自己有夢想，部份人冇打算去實現，部份人則正在一步一步地向夢想之地進發。不過喺哩一批人當中，唔少受社會及利欲薰陶因而將”夢想”扭曲成個人技藝，掙利工具。《狂舞派》中的BombA因課室被褫奪，所以誓言奪得舞林大會冠軍，收復失地。佢地嘅出發點唔係實現夢想，而只係純粹想掙返口氣。而Rooftoppers則視這種物質及個人自尊感為糞土，莫講話一間活動室，就連一隻腳佢都可以放棄。電影一開始有幕係講Stormy將一眾Rooftoppers成員分為兩隊，然後睇吓邊個可以最快咁拎住Stormy嘅鴨咀帽到達天台。哩幕除咗讓觀眾欣賞到道地的競走街舞之外，亦與BombA構成一個鮮明對比。前者享受跳舞的過程，享受果種無拘無束。而後者就一直屈起一兩個細地方，日日苦思新招式來擊敗對手。有次豆腐花自豪地表演自創的”蟹舞”，換來就係隊員嘅嘲笑。對於BombA黎講，夢想係有前題的，有活動室的前題，有花式上的前題; 對花黎講，就有身體上的前題; 但對Rooftoppers及Stormy而言，夢想就係擺脫一切，實現自我的過程。如果你覺得咁樣做係愚蠢同哂時間，實際上你先至係輸嗰個。所以在”Dream Hunter”這個課題上，單睇兩隊勁舞團的追夢觀就已經高下立見。
上文提到本片以舞蹈為支撐劇情的主力，這個安排一黎要迎合主題，二黎就係想充份將Hip-Hop街舞原汁原味地呈現在觀眾眼前。在排舞師麥秋成及攝影總監鄭兆強的完美配合下，片中的各場舞戲都極賦動感，就連本人都不禁受到嗰種熱情氣氛所感染，並且在座椅上微微旭動身體(可能平日少睇的關係)。工廠大廈一幕更為一般固定於特定空間的舞蹈帶來一種廣闊﹑高速的獨特體驗。當然哩一切都有賴戲入面一班舞者演員的落力演出。在戲中，這些叫人腎上線素急升的舞者以一個筋斗帶起眾人情緒。而喺背後，佢地卻受儘皮肉及精神上的折騰。片尾各種驚心動魄的NG片段就正好反映香港嘅一批年青人，點樣為夢想去堅持，點樣為表達自己而努力。
要拍攝上等舞戲，關鍵可能係剪接打燈，還有動作連貫上，但喺唔少靜態鏡頭上面本人亦格外喜歡，例如係豆腐花背向藍天企起草地上練習一幕，淡淡意境融入其中，叫人心境開朗。美中不足係有部份文戲鏡頭唔知點解會將演員的頭頂空間，甚至半個頭削走，可能係我吹毛求疵了，但確實好礙眼。
其實不論係歌舞片或者係功夫片都好，為求突出主題，好多戲對於”劇情”及”動作”兩大元素，都會採取厚此薄彼的權衡策略。叫得動作片，冇返四五場打鬥戲點見得人呢。但若果過份投入又會適得其反，就好似《拳霸2》咁打到連觀眾都覺得攰。無可否認《狂舞派》的舞蹈成份係比較多，不過導演黃修平喺劇情方面處理得十分周到。單單係豆腐花與柒良嘅情節就可以將激昂嘅舞蹈，還有滿腔熱血的年青人生活，通過輕鬆搞笑的橋段加以調劑。Hip-Hop以外，電影又有描寫太極，cosplay等等城市人認為係冷門興趣/事業的人與事，加強了”夢想”兩字的廣度以及客觀性，值得為之加分。
講到演員，從各大媒體及粉絲俱樂部的反應已經睇出，由蔡瀚億飾演嘅男主角柒良人氣肯定冠絕全場。從Tempo廣告中嘅四眼戀物狂到《狂舞派》嘅脹爆look，觀眾都見證著哩位青春小生嘅脫胎換骨。柒良的角色由於集合咗太極拳師的修心及年青人的衝動於一身，老實講都的而且確係一個老練演員先駕駛得到嘅角色。而蔡瀚億嘅演出就傾向以趣怪性格去包裝一個太極會會長(亦考慮到要搞笑)，再用返一般男生嘅性格去補完哩個角色的內裡一面。考慮到對角色的描寫，即使蔡瀚億的演技未達高分，卻足以讓柒良一角印起每個觀眾嘅腦海之中。
至於女主角顏卓靈(應該用”主角”去形容比較貼切)，其飾演的豆腐花則是一名典型的追夢少女。開朗﹑愛闖禍同埋有心宜男神等等經典特徵，顏卓靈都做到極至。遺憾係本片對於這麼一名夢想少女嘅描述純屬有限公司。本人對佢嘅印象只係覺得佢有點似湯唯= =，還有一身嘅好舞功。即使後期有場感人嘅崩潰戲，但豆腐花一角依舊比唔到演員除跳舞之外嘅更多發輝空間。如果有下一集的話，希望編劇可以將花塑造得更俱立體感，否則觀眾仍然會聚焦喺”太極舞王”身上。
值得一提，Stormy這名角色的遭遇並非天馬行空，而係其真人演員Tommy “Guns” Ly的真實寫照。Tommy當年因堅持跳舞而切下患有腫瘤的右腳，其貫徹理想的決心，無論喺戲入面定現實中都叫人敬佩。
睇完《狂舞派》，意猶未盡之餘，亦帶一絲失落。睇見戲中的豆腐花，Stormy，佢地為夢想付諸實行，並為之而犧牲。再睇返《星夢傳奇》入面果啲突然由演員變身成追歌夢的藝人，實在令人無比慨嘆。另一個失落係本片雖未有舗天蓋地嘅宣傳，但通過口碑還有藝人力撐，這部小本製作已經衝破千萬票房大關。其中舞王郭富城更揚言要拉攏發哥一同客串續集，以打造一個星光熠熠的《狂舞派2》。但問題係哩類獨立電影係咪缺少巨星加盟就等於冇出頭天?香港電影發展近十幾年都係市場主導。《無間道》﹑《葉問》﹑《低俗》，只要觀眾受落，續集山寨就接踵而來。特別係當好多本地導演都齊齊北上搵食嘅時候，《狂舞派》算係難得嘅正宗本土製作，在商業上亦取得驕人成績，但若果《狂舞派》嘅成功可以令觀眾對這種獨立電影重拾信心的話，咁我相信唔洗幾耐香港就會繼80,90年代後迎來又一次百家爭鳴。(樂觀mode)
個人評分: 7.4/10
>
有你既支持，就係我地最好既推動力，齊齊參與
「有玩、有FUN … Post76.com」
<
歡迎進入我地論壇對本文章發表您的回覆啦^^”
http://www.post76.com/x2/forum.php?mod=viewthread&tid=169910&fromuid=16
*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***
