林超賢最新作品《激戰》未上映就已經成為城中熱話，而@肥狗仔@就選擇於電影差不多落畫嘅時候先入場觀看。不過喺未睇之前，可能太耐冇睇張家輝，有點先入為主嘅原故，所以當《JET》刊登咗嗰張”腹肌照”嘅時候，我同唔少網民一樣都佩服Photoshop嘅強大以及香港媒體嘅智慧。後來得知有關相片並非移花接木，本人就更感驚訝。因為喺張相出街之前一個星期本人先岩岩睇完張家輝嘅《綫人》，如今一個做開潺仔角色嘅演員，搖身成為肌肉型男，單單係哩件事就足已拍成一部科幻大片。
無可否認，身邊好多朋友都係朝著張家輝身上，有如奇蹟般嘅肌肉而走入戲院。情況就好似一名事途平平，毫無人氣嘅女藝人宣佈下海拍咸片，眾人就會突然對哩齣電影產生濃厚興趣一樣。不過事與願違，有睇過嘅朋友都知道”肌肉輝”嘅出鏡率其實唔多。咁所以當有人問: “冇咗張家輝嘅身段，仲有咩野可以支撐《激戰》?” 有人就會答”彭于晏”，或者係”勵志”。而本人睇完之後認為，”肌肉”仍然係本片嘅最大亮點，因為《激戰》兩字所涉及的抗爭對象並非指對手，亦非指生活，而係解作”與自我的激烈掙扎”。至於張家輝身上的肌肉就係最佳印證。
其實時下好多電影，只要睇劇情簡介就會大概知道套戲講咩，特別好似《激戰》哩類涉及到拳術打鬥嘅片種，情節上少不免會公式化。即係話主角一開始為理想而嘗試，踏出第一步後失敗跌倒，然後由從失意中重新振作，最後迎來成功，勵志得可以做教育電視材料。但令人意外係《激戰》對有關情節處理上顯然係更加成熟。本片中，扮演”人生輸家”嘅除咗有張家輝”程輝”之外，仲有彭于晏飾演嘅”林思齊”以及由梅婷飾演嘅”王明君”。三人背景以致遭遇都不盡相同，卻同樣為理想發奮圖強，以跨過自己心中嘅牆壁。而《激戰》之所以比同類電影優勝，此因上述的奮鬥三人組並非全數”成功”。有的可能因心理問題而戰敗，有的可能達成目標，但卻為此付出咗沉重代價。電影巧妙地以三人三個不同命運，從不同的角度去將”勵志”描寫得更加立體，更具說服力。並通過程輝及其師父嘅一句說話黎說明縱使努力過亦未必成功，但”怯，你就會輸足一世!”
香港不乏警匪槍戰片，但近年林超賢拍嘅電影我都會抽時間去欣賞。個人十分喜歡佢用的色彩對比，還有無數安排恰當的hand held鏡頭。同一題材，比著其他導演拍，即使劇情緊湊萬分，你都知道係虛構的，而林超賢的利害之處就係將哩堆”虛構”嘅鏡頭賦予一份寫實感(當然亦要演員配合)。來到《激戰》，配合導演一貫的拍攝手法，在澳門的傳統街道上反而俾人一種舊情懷，絕對係始料不及的，特別係程輝開摩托車嘅情節，實在有點《文雀》嘅既視感。而喺懷舊嘅另一邊廂，部份描寫主角進行”人體鍊成”時嘅艱苦歲月亦拍得十分到位。有場係程輝於沙灘上面鍛練，大海茫茫，獨自喺海岸線奔跑，型爆之餘，亦盡顯銜沙填海之意。
既然本片係一齣關於拳擊嘅動作片，打鬥處理得馬虎實在講唔過去。戲入面，程輝等人所打嘅拳術屬於MMA(混合格鬥)類別。早於08年，由甄子丹主演嘅時裝武打片《導火線》亦曾經以MMA作為戲中的武術風格，但可能受限於各種武術設計，當時觀眾對MMA與一般功夫的分野仍然唔太清楚，反倒叢林槍戰一幕更加搶眼。可幸是同樣嘅失誤並冇發生喺《激戰》身上，單單係頻繁的摔跤鎖頸就已經為傳統拳擊電影注入獨特新鮮感。特別係關於”解鎖”絕技，本片唔會用”省略一萬字”的方式，以凌厲的剪接將拳手解圍的方法刪除，反而經常拍攝出拳手進行解鎖的戰略實況，讓觀眾在欣賞眼花撩亂的一系列野蠻腳術同時，可以稍為聚焦於相對講求策略的小動作上。至於拳手嘅每一拳亦爆發出拳拳到肉嘅刺激。雖然在運鏡及氣氛營造方面本片未算做得最好，但單睇製作團隊對MMA細節的執著及表現都已經值回票價。
《激戰》嘅另一個驚喜就係笑點比想像中要多。始終”拳擊 + 搞笑”哩個組合對上嗰次已經係13年前嘅《茅趸王》(冇記錯的話)，事前冇唸過題材咁嚴肅嘅電影居會有咁多爆笑位。不過，最難得都莫過於原來張家輝係負責做搞笑嗰個。 (咦?佢以前唔係不樓都搞gag嘅咩?)
形神兼備係評價一個出色演員嘅基本指標。根據哩個標準，本片入面大部份演出者都做得頗為出色。當中較為突出當然要數男主1號張家輝。老實講相比返以往的《証人》同《綫人》，站在演技層面上，今次張家輝飾演程輝一角可能黎得比較輕鬆。但對演活程輝哩個過氣中年拳王黎講，張家輝依舊交足功課，並將程輝嗰種對自己嘅年少無知嘅痛恨，對歲月流逝嘅無奈表現得淋漓盡致。
至於男主2號彭于晏，則一改以往青春﹑熱血青年形象，悅變為一個更成熟嘅大隻仔。在角色設定上，由於林思齊原本係富二代，最後因為父親破產淪落到澳門做拳手。所以當見到林思齊首次戴上拳套，半裸上陣嘅時候，我不禁在心中大叫: “林超賢，你今次揀岩咗演員!” 相比程輝以四十幾歲高齡速成建美身型，要一個衣食無憂，終日遊玩嘅有錢仔短時間內學會拳術，難度絕對唔比前者低。而彭于晏嘅樣貌本身就比較”娃娃臉”，配合面上嘅鬚根同肌肉，彭于晏的演出對林思齊這名角色增添了不少說服力。比較可惜是彭于晏出場機會唔算太多，可以發揮的機會好有限。
另外，憑本片奪得上海國際電影節最佳女演員的馬來西亞童星李馨巧，其表現的確比”母親”梅婷更為出彩。縱使戲入面李馨巧大部份時間都牙尖嘴利，不過面對母親嘅情緒問題，哩位只有10歲嘅小演員亦能夠流露出感性嘅一面。話佢係童星行列嘅潛力股都不為過。
每次唸起程輝，唸起佢為戰勝頹廢人生，而使勁地將生理及心理上的屏障衝破嘅時候，我腦海中就會閃過一齣齣同樣勵志嘅電影畫面。好似《洛奇》﹑《尋找幸福的故事》﹑《驕陽似我》，還有無數咁多咁多…然而喺眾多片段中，竟然冇一幅畫面係屬於自己的。《激戰》通過虛構的故事，以及入面一班分別被困於缺乏目標﹑創傷還有因犯錯而抬唔起頭嘅人，與觀眾產發共嗚。在現實中，張家輝再以其速成肌肉去引證電影中嘅光明面，其實每個人都可以實現。哩家睇返張家輝身上嘅六舊腹肌，再睇返自己嘅”六神合體”…究竟係自己做唔到，定還是冇決心去做，相信睇過嘅版友心目中都會有個答案。不過最起碼，電影入面嘅程輝﹑林思齊及王明君，佢地都冇放棄過。
個人評分: 7.7/10
>
有你既支持，就係我地最好既推動力，齊齊參與
「有玩、有FUN … Post76.com」
<
歡迎進入我地論壇對本文章發表您的回覆啦^^”
http://www.post76.com/x2/forum.php?mod=viewthread&tid=169150&fromuid=16
*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***
