首先祝大家中秋節快樂, 人月兩團圓! 話說一排無寫文, 因為最近好鬼多玩具. 我呢幾個星期好好彩, 識多左幾班新朋友, 而且每個人都有獨特既設備, 隨身音樂就係呢點好鬼吸引, 可以隨時帶出街同好友分享!
好啦入正題! 今次要寫既小弟另一對私伙: ASG2, 不過係特別版 – Stealth Version. 係AV展2013小弟有幸訪問左Dale一陣, 佢話Stealth版本係用上SR 71戰鬥機既油漆黎製作, 外觀真係一流, 同埋個外殼用左最新既3D打印技術 (即係每對耳機都唔係倒模, 望真D又好似真係有D唔同! 哇哈哈哈!) 不過我要強調番, 根據佢所講同普通版本既ASG2既聲音係一樣架! 所以, 大家唔好有幻想啦…
由於已經有開箱文, 所以我循例upload幾張相, 廢時純文字版本俾你地鬧爆啦! 個包裝其實幾好, 我幾喜歡黑紅既配搭
好啦, 強暴地撕開佢既包裝之後見到…
配件包括有耳膠 (單節, 三節), 保用卡, 扭bass既螺絲批, 清潔棒, 說明書, 同埋耳機本體…當然有個靚靚盒啦!!! 再黎兩個close up…造工真係好得! Finish得好好! 試過有幾次都被搭訕, 問我用緊呢對乜黎, 收視率絕對好高!
相入面條線係私伙野黎, 屬於Siltech Royal Signature 系列入面既 Duchness Crown, 係由HD800線改造而成, 今次測試主要都會用呢條線, 因為原裝線實在一般…
容許我講小小廢話, 話說對ASG2 demo我好早已經試左, 果陣對佢既評價非常差, 包括幾位友人都持有相同意見 (係AV展2013試多左次發覺有驚喜, 所以最後懷疑係對demo有問題), 講番對耳機先, 都係果句, spec我唔講太多, 只係強調番佢用左15mm既動圈, 呢個size用係耳機唔多見…究竟會係點既呢?!?!
今次係左夾右夾之下, 用左E8+KM01 (8 core siltech jumper)+ASG2 (siltech iem cable)黎試聽, 有圖有真相…
開波前講下個前端先, E8我唔洗多講啦, 佢既LO一D都唔差, 清新同埋平衡, 力度亦非常夠, 至於KM-01, 呢部係一部MIJ既隨身耳擴, 全球限量300部, 成部AMP用左黃銅黎整 (所以氧化得好快, 不過我幾喜歡個vintage既感覺), 佢係我暫時聽過唯一一部零底噪 (或者接近零底噪…起碼我聽唔到…) 呢點真係好驚人, 亦都係除左限量300部之外我主要買既原因…另外佢既動態非常強…好適合本人既口味…
實試感
一開聲…我覺得有驚喜!!! 同我好多係網上見既評語有D唔同, 佢唔可以話係清, 但絕對唔可以話得上濛…(事後試埋條原裝線…發覺濛左唔少…同埋聽左幾秒就除低了…有師兄話條原裝線煲後幾得, 呢點可能留待佢地既分享啦!), 低頻非常雄厚, 有勁度有量度有深度!!! 可能呢個就係15mm單體既威力, 佢幾有威迫力, 所以bass head既朋友們都可以一試,, 我自己就非常滿意.
中頻係條線影響得最多既部分, ASG2加上Duchness Crown既調音, 中頻順滑得黎非常有味道, 暖暖地聽得好鬼舒服, 高頻既延伸度幾好, 但穿透力超級強…我唔知點形容, 總之好似D聲射入你個腦度咁…我試過用其他AMP個效果無咁明顯, 但KM01我覺得真係推得ASG2唔錯.
廣闊音場
音場黎講ASG2好鬼闊, 真係好闊…但難推得開呢點係真既……3D度幾好, 分析力定位都屬於上級, 完全無投訴. 佢既動態係非常非常強, 係會聽到fing頭果隻, 聽流行曲真係好好, 我自己非常喜歡, 係最近聽得最多既其中一對耳機!
總結
總括黎講, ASG2絕對對得住佢既售價有突, 就算Stealth 我都係咁話, 加多$800可以買到虛榮同埋咁好既手工 (個人覺得黑色+紅色LOGO好型), 我覺得值得! 另外佢真係唔容易驅動, 我試過用其他設備黎推, 得出黎既感覺不太理想, 所以各位有興趣既師兄們可能要在前端下D功夫啦, 我覺得個圈幾難推得靚, 同埋線材都幾影響到佢既表現…不過如果你搵到適合既設備, ASG2絕對唔會令你失望!
最後講番小小個人既感受, 最近其中一個最熱門既都算係圈鐵技術, 連Sony都將會發行圈鐵新產品, 小弟有幸聽過唔少圈鐵, 講真呢個技術真係算係一個新既突破, 對比好多以前既旗艦真係強左唔少, 小弟昔日既摯愛如W4R等等而家都變成歷史而比下去…不過有一點就係呢類型耳機對於前端既要求亦都越黎越高, 所以一闊三大之下, 選擇咩耳機真係要小心, 你玩得旗艦想發揮得好, 前端真係要投資番一定既數目…
No Pain No Gain!
>
有你既支持，就係我地最好既推動力，齊齊參與
「有玩、有FUN … Post76.com」
<
歡迎進入我地論壇對本文章發表您的回覆啦^^”
http://www.post76.com/x2/forum.php?mod=viewthread&tid=169612
*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***
