早排上網, 睇到我地版務總管之一的Mankoo大哥, 重出江湖著手換野又再玩過(做好準備，迎接夏季 Sommer 2.5/4mm), 知道佢向 Simon大師入手左幾條近年非常火熱既超高C/P 值 Sommer 電源線, 小瑟自從生左細仔之後, 都未有時間動手玩下線, 攪下自己套機, 呢排小朋友都開始穩定, 咁小瑟又開始身痕勒, 見Mankoo大哥入手之後, 對條 2.5mm 5G用係部膽後有非常之高既評價, 就係咁小瑟都平平地, 買條返來比部Onkyo PR-SC5509試下(HKD$5XX, 真係一試無妨啦XDD), 睇下同我依家用緊既PE LAB 既比較係如何先!!!!
其實小瑟已經唔多再買線架勒, 因為始終自己套機又唔係真係什麼過百萬既器材, 而玩左線之後, 試過咁多條, 覺得岩玩抵玩既, 小瑟都同大家介紹過, 基本上都知道自己套機係屋企既環境, 都已經去到盡, 不過見到 Mankoo大佬都換哂成手, 又比佢毒二毒, 真係好想試下呢條 Sommer 2.5MM 5G究竟有咩能耐, 所以就諗住入手來換比 Onkyo PR-SC5509 用下, 睇下效果如何勒~~~^^”
講下條線既質感先, 首先Sommer 2.5MM 5G, 2.5mm意指線芯直徑為2.5mm, 以5股作為一條, 入插頭就以 二條Live, 二條行Neutral, 最後一條就行 Earth咁入, 入面打媽行二條咁入, 夠力之餘又夠靜, 而美式頭尾就用上連美國大佬 NBS Cable都係用既呢套頭尾插, 美頭係Hubbell 8215C, 而 IEC尾就係德國 Martin Kaiser, 連NBS都用, 相信品質都好受到肯定呢. 再加上西門大師做線既手功, 相信係Hi-Fi界或DIY界都冇人會懷疑其手功之精細, 對線芯要求之高, 係去到另人炸舌既地步的, 點解小瑟會用到”炸舌”來形容呢?? 事緣係咁既……
有次76攪團購電源線, 有個版友囉左條線返屋企, 好奇之下, 想睇睇西門大師手功如何, 一開個MK頭, 點解果三條線芯, 入個頭都入得咁鬆既? 都冇上緊條線既?? 於是就打來問小瑟, 小瑟就打電話比西門大佬啦, 西門兄答道: 「西門做條條線, 都係將所有線芯岩岩好上到掂實又唔會鬆出來就停架勒, 原因就係唔希望因為大力上實會令線芯受損, 因為線芯一損, 導電質素就一定會打折扣架勒」, 聽到呢度, 小瑟就明白咩叫發燒友, 竟然上一個頭都會考慮到會唔會令線芯受損而影響質素………..一個字, 「服」啦~~^^”
另外如果大家係英插FANS, 英式一向 C/P 值極高既都會係用上 MK 紅頭+4781 IEC尾, 呢個絕對係英式線中 C/P值不二之選啦, 當然你可以玩得更好, 買套古河頭尾另Sommer發揮得更好啦!!!! XDDDDD
初試啼聲(聽歌)
有睇過小瑟既文章都知, 小瑟搬機係何等辛苦既事呢, 好不容易, 終於都換走左跟左5509多年的PE LAB, 換上呢條 Sommer上去, 希望換左之後, 我唔需要再換返啦, 其實之前都試過好多次HDMI換線之後, 最終都係換返舊果條上去, 呢個動作其實都真係幾辛苦的呢!!!!
先黎試下聽歌先, 首先小瑟就用左早排我地76既星中之星活動【《學而。唱 chanteur》Pure Audio Blu-Ray】藍光唱片一試先, 呢隻碟既錄音小瑟個人覺得定位非常唔錯, 又有24/96呢個咁”神聖”既字眼, 用來做測試就最好不過勒. 先聽下第三首Crazy For You, 重新編曲既 Crazy For You, 有著一股可以另人產生莫名既輕快感, 而最初前奏敲擊部份, 係 Sommer 線既協助下, 音場明顯立體左, 因為小瑟喇叭其實都好近後牆架勒, 但係都可以聽得到樂器由喇叭後位置形成左一個小小既音場, 呢個感覺之前都唔會咁覺, 唔怪之得, Mankoo大佬要一次過成手線都換哂佢, 原來用佢來聽歌的確係幾好咁喎!!!
初試啼聲(睇戲)
之後當然要試返小瑟最鐘意既電影環節啦, 近日都出左好多新電影, 咁今次我會搵來一套新, 一套舊片來試試, 先試下舊片先, 第一套係【美版創戰紀】, 小瑟當日係美國旅行時, 見到只賣USD$19.99咁平, 就拿拿林囉上手唔放, 之後返到來香港, 就因為換左3D之後, 又以豬仔價HKD$2**將 3D版本入手, 原因真係為左一開場主角進入左電子世界之後既第一場比武呢….^^”
大家都知道, 創戰紀呢場比武既背景音樂係好激昂, 充滿住低頻的, 而包圍感亦都係好強既, 再加上全電子音樂, 如果部機聲底係燥燥地, 想開大聲D都會有嘈炒既感覺, 換上左 Sommer 之後, 背景明顯干淨清爽左, 電子音樂既節奏感非常明快, 而低音亦都收得好圓好滑, 最正既係D電單車飛來飛去, 炒來炒去時, 包圍感同連貫性都增加左緊密度, 架車炒埋黎D聲真係好似由畫面飛出來咁, 十分刺激呀!!!!XDDDD
之後小瑟就囉出呢期都好新鮮既【港版魔境仙踪 3D + 2D 藍光碟】出黎試下勒, 因為套戲都有D位係幾炸得同埋主要係呢排都有小小喜歡左入面果二位女主角啦^^”, 當然佢都有D位係可以另到屋企果5隻喇叭仔十分忙碌啦, 就好似龍捲風果段就係勒, 囉佢來試換左條Sommer之後, 又會係咩一回事啦. 好, 黎料先!!! 因為呢套戲既對白比較多, 一開始對白位已經聽得出 Sommer呢條線既抗干擾應該真係做得幾好的, 以佢呢個身價可以令音質既干淨度提升得咁明顯, 係有小小比小瑟一點始料不及既, 而又可能因為背景靜左, 所以好多平時都聽唔到既細緻聲, 依家都可以聽得返, 尤其係呢隻唔知什麼水中飛出黎咬主角果隻 “野”, 佢飛出黎時果D “吱吱”聲, 坐正係皇帝位再加埋睇3D既話, 真係感覺好似就係我面前咁, 而小瑟呢次仲大鑊, 本來諗住開頭睇到佢入”魔境”就算架啦, 點知一開…..睇哂成套戲……~_~(我個人就最鐘意白色果位女主角勒!!!!!@@”)
試後感
小瑟之前一路都用緊由 康大師遺作 PE LAB作小弟既前級 5509既電源線, 而今次真係因為係76上見好多師兄都有玩呢條線, 加上Mankoo大佬推介, 所以就決定搵西門大師整條來試試, 係價錢上其實都真係唔算係貴野, 我一條5尺西門兄都只係收我HKD$600蚊有找, 係呢個價錢上, 如果硬係要同一D千多元既線材比較, 佢一定有其短處, 就好似小瑟試過插係藍光機上, 對比返 EarlyBird Power 3.5 來講, 畫面既 SHARP同 DETAIL都係未能夠可以佔到任何優勢, 係某D畫面下仲有一點比下去呢, 不過當我插入部AMP上, 佢係聲音既提升上, 尤其係小瑟聽歌時既感受, 就真係非常之明顯, 而好彩小瑟係用 OPPO BDP-103藍光機, 有雙HDMI輸出, 所以小瑟會直接將HDMI 1上TV, 所以係畫汁上就少左一個考慮, 而當大家睇到呢份小瑟既小評之後, 依家條 Sommer已經係緊緊地同部 ONKYO 5509結合了一起, 效果亦越來越成熟, 當然西門大師父既獨家煲線服務, 亦另小瑟可以慳返唔小時間就可以一試線材既真正實力啦!!!!^_^
>
歡迎進入我們的影音玩樂討論區發表意見.
http://www.post76.com/x2/forum.php?mod=viewthread&tid=161957
*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***
