有幸從朋友手中得到了Sennheiser K2HD 發燒國語CD，既然係Sennheiser 有份既攪作，我就用返新入手既IE80去反覆聽左好多次，我平時比較少聽國語歌，未聽過就當新歌聽，想分享下以下幾條track：
Track 3 – 偶然（陳秋霞）
先講音色，鋼琴聲彈跳力十足，樂器定位分離度亦交足功課，估唔到一D比較遠古既錄音可以做到咁！
Track4 – 我的1997（艾敬）
呢隻歌我自己覺得係全碟入面無論係音質同歌曲本身都係最好的，好有現場艾敬係你前面而後面有兩個結他手伴奏咁，中段又加插小調旋律，唱腔又特別，唱得出嗰種好憧憬到香港既少女！不過唔知到最後真係到左香港會唔會大失所望呢！唔知艾敬而家仲有無唱歌呢？
Track5 – 歡顏（張清芳）
其實呢隻無乜野去討論，純粹鍾意隻歌既旋律，翻唱黎講張清芳算唱唔到D乜野特色出黎！
Track7 – 寂寞公路（伍思凱）
背景好靜，unplugged形式演繹，伍思凱放柔把聲真係好好聽，凈結他再加一把靚聲靚旋律，舒舒服服聽歌就係咁簡單！其實有時真係唔需要好似＂特別的愛給特別的你＂咁嗌出黎！柔柔地舒服得多！
Track8 – 悲秋（陳艾玲）
其實從來都無聽過呢位女歌手既歌，佢把聲真係好靚，甜得黎又有力，唯太多講野位，雖知道歌係用黎唱唔係講的！
Track10 – 是否（蘇芮）
唔駛點介紹，＂假如＂既原曲國語版，由蘇芮唱當然滄桑味出哂黎，難得音樂部份亦做得出色，係呢隻碟第二首重點推介！
Track13 – 愛你（姜育恆）
唱腔幾獨特，幾鍾意嗰種無尾音既唱法，人聲好出，大路情歌，易入口！
Track14 – 天堂（鄭怡）
另一靚女聲，又係靚得黎有力，唔知點解又有D講野位，講少兩句唱多兩咀其實咪仲好！
其他track因為並唔係小弟杯茶，所以不作分享了！
總結
呢張碟選歌方面都相當大路易聽，特別係人聲處理得相當突出，或者係部份歌曲年代比較久遠，就算經過K2HD處理音樂部份確難以與現今新錄音技術比較！呢張碟相信可以比到我呢D 60後（係60尾）一個重拾回憶既好機會！
>
歡迎進入我們的影音玩樂討論區發表意見.
http://www.post76.com/discuss/viewthread.php?tid=126261
*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***
