近來非常身痕，在上年眾多的新品牌擴音機分享會及試聽會中，其實暗地裡已經埋下換機的毒性，眼見新一代的所有新機盡出，全部係聲，畫，有著顯著的進步及質素提升，在多媒體功能，網絡應用上，都有著非常之創新或好玩的原素加入，就係因為咁，小瑟既身痕症終於都要爆了，但始終口味呢樣野，非公式標準，更非他人可作決定的，所以最好就係試多Ｄ，聽多Ｄ，而眾多新機中，小瑟就先問廠方借來呢部 LX-85，試一試呢部比上代 LX-83，一味比人感覺只識＂尖高薄＂作風，及在低音上有所改進既 Pioneer SC-LX85，希望小瑟可以借呢次機會有比較長既時間，可以同呢部新一代日本仔名器，好好相處一排，瞭解佢個中既性格先得。
我諗大家如果有留意上一代的 SC-LX83 都知道佢後面既所有端子，都冇用上鍍金端子，就係呢個原因，好多玩家及對影音有要求的朋友，都對廠方呢個決定感到好失望，而小瑟亦都有同香港的代理們反映過，貴為＂老二＂的 8系，有咩可能唔用上鍍金端子來對傳送作出優化呢？？唔知係咪佢地都聽到我地既聲音，所以今次黎到 SC-LX85 廠方又用返鍍金端子讓一眾玩家又可以對呢部 P 就老二，有返不小好感呢！！！
基本功能
SC-LX85今次就採用了自家研發的「Direct Energy HD」Power部分，取代左上一代的IEC POWER，提供9聲道的優質輸出功率。並以32-bit傳送，將聲音D/A轉換器大大提升至192kHz/32-bit (只限SC-LX85，呢個連75都未有呢！)。
另外當然 LX85 一定有埋 Pioneer 獨家研發的PQLS精準石英鎖定系統啦，配合返依家市面上新出的藍光機例如，BDP-440及BDP-LX55都可以對應，透過 HDMI 端子傳送幾乎全無抖動的多聲道音樂資料，而現時的 PQLS 功能更支援 LPCM 及Bitstream 訊號傳送，大家可以係玩HD音效時都可以應用，對音色既完整度大大提升。
而 THX 認證方面 SC-LX85 取得 THX Ultra2 Plus / THX Select2 Plus認證。THX Ultra2 Plus 是THX認證中的最高級別。此外，SC-LX85 亦都跟以往一樣，擁有頂尖專業錄音室，英國 Air Studios 進行音質調整，並得到Air Studios Monitor認證，呢 D 上代有的出位認證今代都一一落齊。
SC-LX85當然內置最新高清 HD 音效格式解碼，所有的高清音效格式包括 Dolby TrueHD 及 DTS-HD Master Audio。當然亦對應 Dolby Pro LogicIIz，六可配合 Pioneer 的自家 Virtual Height / Virtual Surround Back 模式來模擬前高置或後置揚聲器。另外亦都有一個叫 Virtual Depth 模式功能模擬加強前置喇叭更深音場，用以提升 3D 內容的表現。
LX-85內建一個新功能，叫D-Filter模式功能，D-Filter內建三種主要模式，分別係 SLOW、SHORT、SHARP，有說這三個模式來將 AMP 的性格轉換，不過小瑟試過當中功能其實效果未算好明顯，係個 SHARP 比較上明顯覺得係高音出小小，其他二個 SLOW 同 SHORT都唔係好覺有咁明顯既特性呢。
Pioneer 獨有全頻相位控制功能 (Full Band Phase Control)都可以係呢部 LX-85上搵到，呢個功能據講係有效改善多聲道揚聲器各單元的相位不協調，並套用新既低音管理系統，以補償重低音喇叭和主聲道之間的相位延遲，係 HIFI 界別上，相位問題不嬲都係好多發燒玩家調機的重要功夫，而 LX-85 可以輕易地以自動測量方式得到相位調正功能，的確係為一眾用家想得非常周到。
拉下面板，就可以見到有好多不同既制以方便大家係未有 REMOTE 既情況下都可以控制到部機，不過計小瑟話其實依家用呢個位既人相信都冇幾多個，因為依家D機已經有哂 iPhone / iPad Apps, Android Apps，就黎連 REMOTE都唔洗用了，當板既制仲有人用？？除非……………..XD
Pioneer 的 獨門秘方的 MCACC –
MCACC 係 Pioneer 擴音機既多年獨門秘方用以返定多聲道自動音場補正的，差唔多可以話係所有 AV 擴音機都會有呢個功能，大家只需將附送既收音咪接駁擴音機，所有接駁到 AV 擴音機既喇叭就會輪流發出測試聲音，然後分析喇叭音場及播放環境，之後就由擴音機既電腦系統自動調校出所有既設定包括音壓，喇叭分頻點，相位，及對每隻喇叭不同的 EQ 音場修正，對於香港既家庭三尖八角而大家又未有可能有專業既儀器去做房間既聲學處理，呢個 MCACC的確係可以另到大家可以有一個更清晰既方法去瞭解自己喇叭既特性，尤其係依家 Pioneer 出埋係 iPhone，iPad，Andriod 上既 apps 之後，可以有埋圖示比大家去瞭解各音頻既線性圖示，真係一個字，＂PRO＂呀！！！！
MCACC 中有分別有多種不同的採納方法，有 FULL AUTO MCACC，AUTO MCACC，ADVICE MCACC，而今次小瑟就會試試用上 FULL AUTO MCACC 及以下幾種 AUTO MCACC中的自動調校之後，再儲存在不同的設定檔中，以得出效果的同大家分享。
SYMMETRY – 執行每對左,右喇叭的對稱修正,使頻率振幅特性平淡
ALL CH ADJ – 是所有喇叭都採個別設定,任何聲道亦不特別加重效果的”平化”設定值
FRONT ALIGN – 根據前置喇叭的設定,設定系統中的所有喇叭(一對前置喇叭不會採用等化處理)
做完一次 MCACC 之後，再由 SPL 程式測試所有喇叭的聲壓與距離。
以下是由 Pioneer 方面做出的一個另用家簡單又易明於佢地既獨家功能的一個小程式。
Full Band Phase Control
試片正式開始
設定好一輪之後，小瑟分別用左好幾隻碟去做測試的。首先係用上港版變形金剛第三集，我諗呢年如果要試機，呢隻碟絕對係穩膽呢，大家都知道呢隻於既音效製作水準之高係近年難得一見的。
而小瑟一開始就用上 CHAEPTER 16 狂博二派街頭槍戰，到空軍攻入城市一段，再一路睇到鐵蛇＂鎖＂緊大廈一幕。三個唔同既 MCACC 模式都有不同的特性，小瑟就用上首先 CH 16 狂博二派街頭槍戰來測試究竟小瑟既口味先，用上＂SYMMETRY＂既設定，係呢個設定下既85，感覺成個環境效果都非常之豐厚，每一下子彈聲及低音打出都十分有＂力＂水，所有野都埋身左，但相對仔細度就變得冇咁充足了，而＂ALL CH ADJ＂就有返 Pioneer 一貫既仔細作風，仔細度同定位十足，仲聽得出明顯係低音上經過改良，將底頻既層次同質感做得更有水準，更有表現。MCACC 的＂FRONT ALIGN＂的設定上，LX-85 既電腦系統內，係因為注重左前置喇叭特性而作出調校，所以雖然前置喇叭出來既聲音非常既工整，但在環繞效果上就有小小連鎖性不足，故此，小瑟最後都係用上＂ALL CH ADJ＂來慢慢測試呢套變形金剛三呢！！！！
變形金剛3：黑月降臨
試呢段主要係試汽車既引擎同子彈定位既聲音，子彈打黎狂派既機械人上的金屬聲音真係非常清晰有序，小瑟絕對可以數得出幾多粒子彈打到佢既身上，而博派汽車既引擎聲沉實而有層次，成個環境氣氛一下子就即時緊張起來，去到空軍既直昇機跳機時，大家都知道有一段星星叫係咁攻擊佢地既直昇機，D飛機飛來飛去，幾架直昇機撞來撞去，小瑟頭頂就好似有好多架唔同既直昇機想係我既頭頂直插到前台，老實咁講，小瑟真係非常之鍾意 P 記既所散發出來既環繞聲後既回聲效果，係熄哂燈咁去欣賞電話，直頭應該好似屋企深左好多，而最後鐵蛇一幕，大家都知道呢段絕對係小瑟至愛，當鐵蛇＂卷＂住棟大廈一＂鎖＂WOW，小瑟當場係屋企都自己一個叫左出黎，真係好正呀！！！！不過小瑟相比起之前係旺角影音天地做 《Pioneer 遙動聲色體驗會》 示範會時既效果，無論低音同喇叭既回聲深度，都絕對差一段距離…………………大鑊，睇來小瑟呢次絕對係中毒太深，淨係換AMP都應該不能解到毒引了！！！~_~
魔髮奇緣(Tangled)
之後小瑟就選左呢隻 DISENY 出品既近年佳作＂魔髮奇緣＂（中文名改得唔錯，但英文名就真係好差了！），小瑟貪佢有一段歌舞場面，可以測試到 LX-85 既音樂感，係最初一段當長髮公主入左酒吧之後，唔知大家有冇印象，有一幕係佢用把長髮，拉枝樹枝去打果個惡人既頭既？呢幕估唔到試出野來，枝樹枝由上而下一野打落個惡霸頭上時，小瑟竟然可以聽到聲音係由上快速地＂拍＂落下面再回彈返上去，真係好神奇呀，小瑟家中只可以玩到5.1喇叭，不過竟然可以出到有上前置的音場效果，呢個小瑟相信係居功於 LX-85 獨有的相位校正功能（Full Band Phase Control）勒，因為每個喇叭既定位其實係需要配合相位去＂確立＂音場定位的，故所以小瑟相信呢個功能對整個音場係有著一定的重要性呢。
另外當中有一幕男主角＂費華特＂比好多把刀指住果下，又係聽得小瑟非常過引，小瑟既屋企就好似變得唔止得五隻咁小，突然間全屋就好似真係多左好多把刀同一時間咁插向小瑟中間，呢個感覺真係非常之正，到依家小瑟打呢段文字時都依然記憶猶新呢！！^.^
當LX-85 遇上 XPA-5
當小瑟試完呢二段之後，當然唔可以浪費左呢個機會去測試埋 LX-85 同 XPA-5 結合之後既感覺啦，一直以來都成日係 FORUM 問師兄們究竟用 P 記機的話，如果再駁埋後級會係咩一回事呢？？會唔會變左聲，冇左 P 記一向的 DEATIL 呢？？好勒，呢次小瑟就要親身試一試勒！！！係度小瑟不妨比個小貼士各位參考下，當大家如果用 85 做前級的話，記得在前置面板中，按下＂SPEAKER＂按鈕，直至見到＂SP:OFF＂呢個狀態，因為咁樣 85 就會完全將機內的功率放大功能關閉，換句話來講，85就會變左一部純前級了，呢個功能一定要用，因為用同唔用係聲音既純淨度上有著舉足輕重的轉變呢！
小瑟由＂變形金剛3＂到＂魔髮奇緣＂的段落再由頭試一次，小瑟只可以講，如果你未加後級既，請立即加，如果你擔心 85 用左後級會變左另一部機既，請可以放心，85 加上後級之後，冇走樣，變聲底都不特止，仲完全加強左聲音中的力度，密度，仔細度及環繞聲效 DETAIL 的連貫性，對多重覆習音效的細碎聲加強左好多，就好似老變三的鐵蛇果下鎖樓咁，之前聽唔到既金屬破碎聲依家變得清晰左，埋身得來又不失仔細，公主果後歌舞包圍感更勝之前，加後級絕對係增強整體氣氛既必要動作。
i-Pad Apps
依家用屋企既內聯網去搖控屋企既器材已經唔係一件咩特別事，不過小瑟之前就真係好小玩到，不過聽好多科林上既師兄講話 P 記既 REMOTE APPS 都做得幾好，又有齊 iOS / Android Apps，咁小瑟就試下裝係手機上睇下好唔好用先，玩左一陣，雖然功能都好強，不過手機畫面都係細，一於上 i-Pad 玩。
裝完個APPS之後，手上好似多左個控制台係手咁，設定真係勁多喎………………..^.^
因為用左畫形介面，控制部 AMP 就好似變左控制部 PC 咁，我想轉 MODE 聽唔同音效，再唔洗不停咁按個 REMOTE 咁轉來轉去，只需要一按，選岩先手指一＂篤＂………….得左！！！
要開好多其他既功能，亦都有哂圖文示意，真係唔玩開 AV 既新手朋友都非常易明呢。
小瑟尤其鍾意呢個 MCACC 既立體圖表，佢將覆習同難明既喇叭數據用一個 3D 圖利表明比你知你個喇叭既邊段頻率既衰減點及喇叭中邊個頻率比較優性，對喇叭既瞭解絕對係一個非常之好的表示呢。
STATUS 就可以比你一目瞭然輸入既影音數據同輸出既數據究竟係咩，咁你就好易咁可以知道究竟有冇 SET 錯野勒。
好多時大家都會話中置人聲唔夠，低頻好似冇咩感覺，呢個設定就可以幫大家即時將中置喇叭既比重加強，係一個幾得意既功能來呀！！
後記
老實講，小瑟真係非常之唔想還機的，不過開講有話＂借得黎玩，預都要還＂，終於部機都已經還返去廠方手上，小瑟對左佢二個星期，雖然真係玩上手唔係好多日（加加埋埋其實都冇一個星期）。但小瑟真係對佢既乾淨，清純既音質同還原度整高及極仔細的聲效所深深吸引，而且今代在中低頻的重播上明顯係作出過改善，少了那份只係＂一味 DETAIL但尖聲薄聲＂的性格，多返一份肉地，豐富的低頻在中低位，另到環境及氣氛好感增加不小。最衰佢既定價比較上貴，C/P 值唔夠高，如果唔係，小瑟一定會即時將佢收歸家中，作永久保存呢！！！！
。
歡迎進入我們的影音玩樂討論區發表意見.
http://www.post76.com/discuss/viewthread.php?tid=107009
*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***
http://www.facebook.com/post76
https://plus.google.com/u/0/118072674924924911355
