首先，如果你無睇到第一集的話，基本上係無咩所謂的，戲情無特別連續性，大家唔駛怕無睇上一集而怕左唔睇第二集，但當然如果大家有時間的，最好快d去買番隻第一集睇，因為都真係幾好睇的！
MCL 德福場外有功夫熊貓的展品供大家欣賞，拍照留念
如果第一集比你感覺係一套拍比外國人睇的功夫片的話，我可以好肯定話你知，今集係拍比中國人睇的功夫片，除左本身的3D卡通外，交代戲情的文戲同部份場景，都用左中國風格 – 剪影，水墨畫，絕對唔會好似睇迪迪尼的花木蘭咁鬼佬Feel，夢工場明顯睇好中國市場，所以電影整體都非常討好我地呢個華人市場！
戲情方面，節奏明快，層正常合家歡戲，有感人位，有反思位，加上勁多笑料，現場有不少大人細路都笑到卡卡聲，我初時都覺得大人笑到咁有點兒誇張，但睇落去再多幾個笑位後，我自己都忍唔到笑到肚痛，不過當然亦有小部份爛GAG我係唔識笑的，不過坐我前面的小朋友就由頭笑到尾，整體廣東話配音唔算特別好，只能說70分，但3D卡通電影唔駛追字幕感受差好遠，除非好似我咁好有要求，否則今次配音絕對可以接受的，唔駛比我嚇怕！
今次係MCL德福睇功夫熊貓2，新戲院，聲畫有一定保證！
畫面方面，3D非常唔錯，由其係景淺深的風境做得特別好，官方資料係製作團隊實地到中國考察及取景的，所以真係好似，好靚，而畫面的光暗分明，黑夜決戰，海上最終決鬥等等，都睇到動畫師的努力成果，同第一集比，係更上一層樓之作，配樂、爆機位、兵器聲等等，都做得非常好，如果喜歡聽BGM的朋友，更可以睇字幕時慢慢欣賞，非常動聽呢！
成套戲好多試機位的，大家一定會有個感覺就係不如等買碟睇啦，我唔反對大家買碟，但難得有套製作咁好的電影，合家歡笑到肚痛的卡通片今時今日真係一片難求，我真係建議大家用少少錢，買張飛入場，同其它人一齊係戲院大笑一番，減去平時返工的壓力又好，親子話動又好，兩口子拍拖開開心心睇場戲都好，老實講，點都好過比錢睇成個場境都黑到唔知睇咩的魔法學校的！
P.S.: 以上係作為一個正常消費者的評語，如果你對電影要求高的，我再比多少少評語大家，分鏡做得唔算太電影Feel，似一般家庭式動畫，不過係超高班的畫質，尾場最終之戰其實可以做到好震撼的視覺效果 同飛到埋身的3D效果的，但唔知點解無好好利用到，係電腦動畫技術做唔到，定係導演功力唔夠就不得而知了
討論區原文: http://www.post76.com/discuss/viewthread.php?tid=78615&fromuid=4
