又一位亞洲藝人登陸荷里活，為紀念李小龍而拍既作品，傳聞原由周星馳執導及主演，但到最後拍板係周杰倫，不過星爺又好，周董又好，眾所周知都係小龍迷，所以青蜂俠一樣令人期待。
對於一個不是無鐵不歡既愛好者，當然價錢較平既普通版係我首選（雖然呢隻鐵盒版本都好靚吓）。
初時以為周杰倫係戲中必定係大配角一名，點知原來大配角另有其人……。不論你是否周董的Fans，但不得不承認，呢次周董係青蜂俠佔戲頗重，角色做回自己，甚至比主角兼編劇既Seth Roge搶鏡，係咁多角色中較討好一位，以首部荷里活大片來講絕不失禮。
以為係女主角，點知呢位先係大配角，其實金美倫姐既角色換任何一人演均無分別，但如果打算有續集就另計。
故事性 – Ｄ：
講真，呢類個人主義英雄片題材，只要係主角大把錢，車房仔都可親手制造各式各樣新奇武器，無可能都變有可能。加上拍攝手法較誇張及漫畫化，所以觀看時完全唔駛用腦，所以呢次就集中講吓畫質及聲效。
個人覺得呢幕散佈追殺令拍攝手法較特別。
畫質 – Ａ：
全片可用順滑乾淨來形容，有大量夜景及深色衣物器材等程況下絕不含糊展現，完全可從畫面分辨應有質感出黎。周董之紅色毛衣，花園一草一木均非常鮮艷，好少見到咁靚既紅色。車房各名車靚到界手，就連各種武器金屬感及車房背景仔細度亦相當高，可以話係近期少有佳作。
聲效 – Ｂ+：
一套動作片應有聲效自然不可少，呢次係家中既平民級器材亦聽得好滿足。不論爆炸聲、戰車引擎聲、車軚磨擦聲、開槍撞擊聲、打交時傢俱破壞、玻璃碎裂以至背景音樂四圍走等，可以話住程喇叭未停過。
觀後感：
其實成套戲新意欠奉，劇情都熟口熟面。但作為周杰倫首部西片已算合格，亦睇得出電影公司都幾著重周董，起碼連片尾曲都係嘻嘻哈哈既［雙截棍］，雖然唔係大 收旺場，但話唔定會有續集出現。另外一讚係今次Blu ray制作，係近期少有聲畫上都找到滿足感既碟，用黎假日招呼吓親友是一個不錯選擇。
PS：原來大女都係Jay既Fans，重陪我排排坐睇足全場添。
以上純粹個人意見，喜愛與否各人不同，多謝收看。
圖 / 文：SonSon
