Post76 x 安橋SR-607高清視聽會版聚後記

小瑟攪左 POST76都有好幾年, 之前一路都係以網上討論為主, 呢日, 我地終於都有機會可以同一線大廠合作, 一齊攪呢個我之前諗都冇諗過既視聽會, 係度真係要好多謝一眾有份幫手既朋友, 先有今次活動既單位 ONKYO 既 KK, PK, 熊貓先, 有佢地, 先有今次既活動, 難得既係, 當小瑟好唔知醜地向佢地提出呢個請求時, 佢地竟然一口應承, 仲係整個過程入面, 差唔多可以話好似黃大仙咁, 有求必應, 最開心既係, 佢地個個都好好人, 小瑟一向都以為, 做得影音大廠, 公司都一定非常之多制爪, 呢樣唔可以, 果樣唔得, 自由度等於零……點知原來岩岩同我諗既相反, 佢地除左好好人之外, 其實佢地都係同大家一樣, 鍾意睇戲, 聽歌, 玩音響, 好多炸機辛酸史都係大家熟口熟面, 一講即明果隻.

而我地今次之所以可以攪一個完全係我地自己話哂事既視聽會, 真係要再一次多謝安橋香港為我地提供場地同所有既支援, 亦都對我地網站支持同信任. 係度我小瑟再三向香港安橋道謝!!

之後就當然係要多謝有份幫手既 POST76兄弟們 Wil-Wil, Roy, Maner394, Hintel, 245141525, 因為小瑟係要等到收工, 先可以去到現場, 而係小瑟收工前, 其實就係以上既一眾兄弟們係會場上, 不停咁 SET機, 傾細節, 幫手試野, 係度, 小瑟好榮幸咁向大家講聲………….
好高興可以係呢個吹水唔抹咀既 INTERNET世界上識到你地, 有你地既支持, 絕對係我地整個 POST76既光榮呢!

好勒, 老土野講完勒, 小瑟就抹一抹面上激情既淚水, 同大家一齊再次感受一下當晚既氣氛呢!!!!

今次既視聽會地點, 就係尖沙咀漢口道豐澤三樓安橋演試廳, 大家如果之前已經有參與過其他媒體做既視聽會, 都知道, 呢個房既傢生, 絕對已經係非常之唔野小, 依家仲要因為有左Dolby Pro Logic IIz既關係, 已經 SETUP埋全 SET 9.2既喇叭, 係呢個配套下睇戲, 已經可以比美好多電影院……………(當然圓方六院另計啦).

onkyo_post76_01

而除左會場內, 大會仲提供左整個三樓既其他地方比我地所以版友任玩任試, 好似呢個 SESSION咁, 就係安橋同 X-BOX一齊提供比我地版友係未開場之前, 打打機, 試下用 AV AMP打機既過引呢~~~ 係度, 又要多謝埋 X-BOX提供X-BOX360遊戲機比我地, 事關, 今次既高潮除左係睇戲之外, 打機先係最高高高既高潮呀~~

onkyo_post76_02

onkyo_post76_03

之後房內, 就係各位兄弟努力開工, 希望 SET到最好既效果, 等大家都可以係最好既環境下欣賞今次既視聽會呢~~

onkyo_post76_04

onkyo_post76_05

onkyo_post76_06

呢部咁型既黑武士, 就係當晚主角之一既 PIONNER BDP-LX71勒, 佢有幾勁, 我諗都唔洗我多講啦….

onkyo_post76_07

之後就當然係今晚既主角 TX-SR607啦, 依家連行貨都有黑色, 真係非常吸引.如果代理一早可以入到黑色機身, 小瑟就唔洗依家又冇錢, 又想換機咁呢HAIR咩~
(請用少林足球亞周星馳既口吻說出以上對白!!)

onkyo_post76_08

圖中呢位咁型既, 就係人稱賭神既高進先生勒…………….SORRY, 其實佢係比賭神更英俊既KK兄勒~~~~~啪啪啪啪啪啪啪啪

onkyo_post76_09

黎到呢度, 又要多謝下D幫手既單位先, 今次得到安橋既 PK 引薦下, 我地有機會同得利影視囉到仲未出街既白版碟, 可能依家睇緊既朋友都會話”車……….我見過啦”, 咁你好野囉…..我未見過實物丫麻, 當然要影返張相先啦~~ 而各單位亦都分別送出四隻BLU-RAY影碟作為今晚問答遊戲中既禮物!!!

onkyo_post76_10

onkyo_post76_11

當晚要試既碟都唔小, 不過時間有限, 始終都係睇唔到一半…..而好多碟其實都係我地既兄弟們自己帶來既碟, 因為怕大家想睇既戲好廣, 所以好多兄弟都自發地囉左D碟出黎, 睇下有冇需要, 真係唔話得呢~~~

onkyo_post76_12

大家認得呢個頭同電源線嗎??

onkyo_post76_13

去到晚上 7:00了, 各位幫手既兄弟們終於可以抖一抖, 食個飽先, 事關大家都開始做到有小小手軟同埋開始冇咩電, 唔好講多, 兄弟們, 差差電先!!!

onkyo_post76_14

而另一邊廂, 因為時間已經差唔多, 到場既兄弟們亦都開始齊, 一開始時, 大家可能係有小小監介, 因為始終大家都未認識大家, 但其實大家日日都已經傾開計, 好老實講已經熟哂架勒, 所以唔洗10分鐘, 玩場已經開始有唔小既笑聲, 歡呼聲, 當然, 最開心既就係我地亞”線王”啦, 因為視聽會前一日, Maner先同佢細佬一齊去左線王屋企家訪, 仲學到咩係”Subwoofer 拍邊, 咩叫做唔喇叭唔夾聲, 咩叫做分頻點斷層, 後置聲音延遲”, 簡直係未開場先一個熱身既高潮位呀.

onkyo_post76_15

之後時間就差唔多, 大家就入場搵好位, 坐定定等睇戲勒!!! 唔知點解, 去親呢D視聽會, 坐左係度, 心情例必緊張, 免得過都唔想開口講野同比反應, 不過今次係我地友聚+視聽會, 難得有個咁好既器材同機會, 我當然希望大家黎係玩得開心, 唔止係聽野咁簡單啦, 所以就先由小弟同大家講返三五七分鐘廢話先, 等大家都知道企係度呢條友唔識講野都可以企係上面, 咁自己都唔怕會講錯野啦~~~拿…我唔係吹水架, 你地睇下 KK同PK先啦!!

onkyo_post76_16

onkyo_post76_17

onkyo_post76_18

之後就由大家各位自我介紹一番大家係 POST76內既網名, 呢個環節都幾攪笑, 有D朋友一講個名就好似一見如故咁, 哦, 原來就係你乜乜乜, 原來就係你物物物咁, 氣氛真係相當過引. 當大家介紹完之後就係由ONKYO亞貓哥同大家介紹一下呢部新既 SR-TX607既新功能同埋同上一代既AV AMP既改進之處勒, 就好似因應依家 LCD大行其道, 好多機櫃都已經修窄左, 而 607既機身亦都順應潮流作出修改. 另外就係 HDMI提升到 6組輸入, 1組輸出, 視頻上調1080i轉換, 新增遊戲聲效模式: Rock, Sports, Action and RPG, 當然最唔小得就係最新既Dolby Pro Logic IIz啦.

當晚我地試左幾套電影同埋一個BLU-RAY既 LIVE, 當中包括: Final Fastasy 7, 暴劫現場, X-Men, 功夫熊貓同蔡琴演唱會. 呢幾套片都係非常之好爆既, 好似Final Fastasy 7既打鬥中有帶點點柔和既琴聲, 暴劫現既子彈定位, 大爆炸既震撼, X-MEN中暴風女神作法既包圍感, 同最後功夫熊貓同大炮大戰中, 最後一招由下至上既沙石聲音, 都另我對部 607留下左非常之深刻既印象, 真係估唔到一部只售$5000蚊樓下既”入門”擴音機, 竟然可以有如此力水, 可以推到 B&W呢7隻絕對唔易應付既喇叭, 仲可以比人感覺絕不吃力, 我諗安橋廠方係放大既技術上, 一定下左唔小苦功呢.

onkyo_post76_19

另外就係當晚我地仲借左小小時間等大家可以知道電源線對器材真係有舉足輕重既地位, 我地將PIONEER LX71既原裝線同我地團購既Ortofon 3900 Silver線作一個 A/B比較, 大家可能會覺得我講得好誇, 無論係畫質既黑位, 頭髮位, 立體感, 我夠膽講原裝線係差九釐路既, 睇完條 3900之後, 我相信冇人會想用返原裝線, 就連KK睇完都話”喂…..你呢條野真係得喎”. 就連我自己都估唔到, 用返原裝線個畫汁會係咁既!!!

之後試完哂雹影之後, 就到 X-BOX 360既示範, 因為部 607多左幾個專FOR打機既 MODE, 我地就囉佢來試下係呢個咁大既畫面上, 打360版街頭霸王. 講打機 ROY哥真係好熱忱既, 一開波係ROY哥大戰亞定先, 每次有連續技出, 大家必定拍哂手, 大聲呼叫, 因為實在太刺激勒. 之後第一場ROY哥勝出左, 之後就到 JKC710兄落場對亞定勒(冇錯, 我地係輸果個要KEEP住打, 打到WIN為止~~~ ${:1_262:}$ ), 一見佢渣個手制, 先入去效一效D制位, 就知道佢肯定係老手來, 果然, 一開波唔洗太耐時間, 一個又一個既攻勢, 不停咁升, 波, 升,出大野, 好快定兄既”隆”就比JCK710兄既”紅人” KO左了.. ${:1_262:}$